Dil Ki Chokhat Pe Jo Ek Deep Jala Rakha Hai
Tere Laut Aanay Ka Imkaan Saja Rakha Hai
Saans Tak Bhi Nahi Letay Hain Tujhe Sochtay Waqt
Ham Ne Is Kaam Ko Bhi Kal Pe Utha Rakha Hai
Rooth Jaatay Ho Tou Kuch Aur Hasee.n Lagtay Ho
Ham Ne Ye Soch Ke Hee Tum Ko Khafa Rakha Hai
Tum Jisay Rota Howa Chhorr Gaye Thay Ek Din
Ham Ne Os Shaam Ko Seenay Se Laga Rakha Hai
Chen Lenay Nahi Deta Ye Kisi Taur Mujhe
Teri Yaadon Ne Jo Tufaan Utha Rakha Hai
Jaanay Walay Ne Kaha Tha Ke Wo Lautay Ga Zaroor
Ek Isi Aas Pe Ye Darwaaza Khula Rakha Hai
Tere Jaanay Se Jo Ek Dhool Uthi Thi Gham Ki
Ham Ne Os Dhool Ko Aankhon Mein Basa Rakha Hai
Mujh Ko Kal Shaam Se Wo Yaad Bohat Aanay Laga
Dil Ne Muddat Se Jo Ek Shakhs Bhula Rakha Hai
Aakhri Baar Jo Aaya Tha Mere Naam “Wasi”
Mein Ne Os Khat Ko Kalejay Se Laga Rakha Hai
0 comments:
Post a Comment